जळगाव रेल्वे अपघात: ब्रेक दाबल्यानंतर ठिणग्या उडाल्या, “आग लागली” अशी घोषणा, आणि घडला भीषण अपघात
जळगाव: जळगावमध्ये मोठा रेल्वे अपघात (train accident) घडल्याचे समोर आले असून 6 ते 8 प्रवाशांचा मृत्यू झाल्याचा अंदाज वर्तवला जात आहे. या घटनेची माहिती मिळताच जिल्हा प्रशासनातील अधिकारी तसेच रेल्वेचे अधिकारी आणि कर्मचारी घटनास्थळी पोहोचले आहेत. जळगावहून मुंबईला जाणाऱ्या पुष्पक एक्सप्रेसला आग लागल्याच्या भीतीने काही प्रवाशांनी चालत्या गाडीतून उड्या मारल्या. मात्र त्याच वेळी समोरून येणाऱ्या बंगळुरू एक्सप्रेसने त्यांना चिरडल्याने हा दुर्दैवी अपघात घडला. परधाडे स्थानकाजवळ ही घटना घडल्याची माहिती समोर आली आहे.
प्रत्यक्षदर्शींचा अनुभव
जळगावहून निघालेली एक्सप्रेस परधाडे स्थानकाजवळ पोहोचली असता ट्रेनने ब्रेक लावल्यानंतर ठिणग्या उडाल्याचे दिसले. एका प्रवाशाने “आग लागली, आग लागली” असे ओरडल्याने घबराट उडाली. त्यामुळे काही प्रवाशांनी चालत्या ट्रेनमधून उड्या मारल्या. मात्र त्याचवेळी दुसऱ्या बाजूने येणाऱ्या बंगळुरू एक्सप्रेसने त्या प्रवाशांना चिरडले. अंदाजे 9 ते 10 प्रवाशांचा मृत्यू झाल्याचा संशय प्रत्यक्षदर्शींनी व्यक्त केला आहे.
घटनास्थळी मदतकार्य सुरू
जळगावमधील आरपीएफ जवान, रेल्वे पोलीस आणि अधिकाऱ्यांनी तातडीने घटनास्थळी धाव घेतली आहे. जखमींना तत्काळ मदत मिळावी यासाठी आठ रुग्णवाहिका तैनात करण्यात आल्या आहेत. जिल्हा वैद्यकीय अधिकारी आणि रेल्वेचे अधिकारी या परिस्थितीवर लक्ष ठेवून आहेत.
जिल्हाधिकाऱ्यांची माहिती
घटनास्थळी उपस्थित अधिकाऱ्यांनी दिलेल्या प्राथमिक माहितीनुसार, 6 ते 8 प्रवाशांचा मृत्यू झाल्याची शक्यता आहे. जखमींना उपचारासाठी जिल्हा रुग्णालय तसेच ग्रामीण रुग्णालयांमध्ये दाखल करण्यात आले आहे. तसेच तीन रुग्णालयांना सतर्क राहण्याचे आदेश दिले आहेत.
आधिकारिक प्रतिक्रिया
जळगावचे नेते आणि मंत्री गुलाबराव पाटील यांनी सांगितले की, “घटनेची अधिकृत माहिती घेतली जात आहे. रेल्वे स्थानकावर ट्रेन उभी होती तेव्हा लोहमार्ग क्रॉस करताना ही घटना घडल्याचे प्राथमिक माहिती आहे.”
प्रशासनाकडून पुढील तपास सुरू
या अपघाताचे नेमके कारण शोधण्यासाठी रेल्वे प्रशासनाने चौकशी सुरू केली आहे. रेल्वेखाली चिरडले गेलेल्या प्रवाशांच्या कुटुंबीयांना योग्य तो न्याय मिळेल, असे प्रशासनाने सांगितले आहे.
